國皇的新衣

Castle從前,茂里國有個皇帝,聘請了一個頂級裁縫,名叫繼隸。

茂里皇吩咐繼隸為他造一件天衣。

「冇問題,包喺我身上。我有精湛巧手嘅剪裁技術,緊貼時代嘅先進器材,仲有一班精英助手,保證皇上你必定稱心滿意。」

皇上滿心歡喜,對這個油腔滑調的繼隸甚是滿意。

***

三個月後,繼隸如期起貨。

繼隸:皇上,我已經照足你嘅吩咐,製成咗件天衣。呢件天衣唔單只無縫,仲可以根據皇上你嘅喜好隨時變色,冬暖夏涼不在話下,款式仲可以任你修改,係目前最高科技嘅產品。

國皇:件衫喺邊呀?點解我見唔到嘅?

繼隸:呢,咪喺度囉。件衫用高科技特別嘅絲綢黎造,係聰明人至見到架。皇上咁英明,望真啲一定見到嘅。

國皇:(咁又係。科技嘅嘢,我識條鐵咩?) 睇睇吓又好似係喎。你哋見唔見到呀?

隨從:見到。好靚喎,簡直巧奪天工。

繼隸獲茂里皇重重打賞之後,就回鄉下享福,從此沒有再出現了。

***

到了國皇出巡的日子,國皇穿起了這件新造的天衣向大家展示。

蟻民1:嘩,皇上冇著衫呀。

蟻民2:收嗲啦,高科技絲綢黎架,你識條鐵咩?

蟻民3:我都費叉事理佢。同我冇切身關係嘅,皇上著咩衫定著唔著衫,I really don’t fxxking care。

***

為了證明自己是個有智慧的人,國皇一直佯裝自己看得見這件無縫天衣。

而國皇只欣賞精明卓越的人才。為了保著自己的工作,隨從們也假裝見到天衣。

有一天,國皇想外出打獵。他記起繼隸說過,天衣是多功能的,適合各種場合不同需要,只要稍加改動即可,完全沒有難度,簡直快靚正。

惟繼隸早已退隱,留下來的只有服裝部的隨從。國皇千挑萬選,最後選中了士刁拔做近身,專門負責為他修改天衣。

士刁拔:皇上,不如你著番件底衫打底啦,個型挺啲架。

國皇:廢話!呢件係天衣黎架,有幾唔挺呀?你究竟識唔識架?我真係懷疑留你喺度嘥我米飯囉。

士刁拔:咁我盡量試啦。(死狗樣)

士刁拔:(有阿媽生嘅都唔想留喺度。)

懷著滿肚的委屈,士刁拔被吩咐過好幾次,把天衣修改,泳褲、睡衣、tuxedo、中山裝都試過。

這次國皇要求雪褸,就考起士刁拔了。明明是個自欺欺人的謊話,如何保暖?

為了保著性命,士刁拔決定放棄這項 mission impossible,在深夜時份悄悄出走了。

到達安全的地方,士刁拔 send 了一通 email 給國皇:

「親愛的皇上:

小人已出走,請唔好搵小人。

好多謝皇上俾小人呢個寶貴嘅機會服侍皇上。能夠從千萬個候選人之中脫穎而出,成為皇上嘅近身,係小人嘅榮耀,沒齒難忘。

皇上仲記唔記得,當日喺選拔賽之中,皇上問過小人,成為皇上嘅近身,首要係邊三項條件?當時小人第一句就答『誠信』。但好抱歉,小人做唔到,因為小人怕講真話會人頭落地。

為咗答謝皇上對小人一直以來嘅照顧,小人懇請皇上俾個機會小人做番個有誠信嘅人,講番一句人講嘅說話。若然皇上唔啱聽,就當小人冇講過好了。

皇上根本冇天衣,一直都冇著衫周圍走。嗰個繼隸呃咗皇上。咁耐以來,小人就唔信皇上見過有件衫囉。只係皇上寧願相信有,個心就舒服啲。

皇上可以當小人識條鐵,但皇上當日揀咗小人做近身,都係因為小人以前賣布嘅。唔好當小人係流嘅先得架。

其他人唔踼爆皇上,係因為佢哋知道皇上唔接受呢個真相,或者佢哋根本就唔 fxxking care。小人踢爆皇上,係因為小人已經頂皇上唔順,到呢一刻小人真係技窮了,再唔能夠喺一個大話之上無限 top up。

好心皇上就醒吓啦!

祝早日擦亮眼睛,回頭是岸。

叛徒

士刁拔上」

廣告

4 responses to “國皇的新衣

  1. 士刁拔一D都唔stupid喎.

  2. 果然人中出呂布,馬中出赤兔,敢問士刁拔會否考慮揭竿起義,另起爐灶,推翻茂里國皇帝,打夠蒼生?

發表迴響

Please log in using one of these methods to post your comment:

WordPress.com Logo

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s